في حياتي كلها مابلغ سمعي كلام

أحلى من كلمة"من العايدين"بفمها)

كان هذا البيت..مطلع كتبته قبل عام

بيت واحد من قصيدة عجزت أتمها

وامس عاد الوقت نفسه وفي نفس الزحام

شفتها بعيون ناس تلفت يمها

جت تضم الورد بكفوفها شمس الظلام

وجيت لكفوف تضم الورود أضمها

جادل من عطرها ينتشي ورد الخزام

هي تشم الورد والا الورود تشمها؟

عيد الاضحى صار بقدومها عيد الغرام

والغرام أغلى عياد العمر وآهمها

القصايد عيدن بك عقب طول الصيام

عن وصوف الغير..ماغير وصفك همها

يابعد قصايد الشاعر "رشيد الدهام

ويابعد من هو مدحها ومن ذمها

أمس كان العيد وكان الصمت عام

بعثر أيامي بصمت وبكلمة لمها..

صوتك اللي لاهمس لي بمردود السلام

أشعر ان أرجاء الارض السلام يعمها

تذكرون المطلع اللي كتبته قبل عام

صار قفلة هالقصيدة قبل ما أتمها

في حياتي كلها مابلغ سمعي كلام

أحلى من كلمة"من العايدين"بفمها