حمامة الروض ولّي ياشقاويه

مانيب ناقص مصابك يكفي مصابي

انا ماكوّدت اسجّ شوي ياخيّه

زدتيني بسجعتك زودٍ على مابي

الغابيه غابيه بالصدر مكميه

وانا مانيب مهبولٍ يفضح الغابي

اخاف من روحتن ماعقبها جيّه

يومٍ به اللوم يشهق شرهة عتابي

خاسي وهابي مجازي الطيب بالسيّه

راعي الرديّه رديّ وخاسي وهابي

في نحو (ابو الأسود الدؤلي) له نحيّه

ذا النحو نحوي انا وإعرابه اعرابي

ترابي اولى بي ان خابت هقاويه

وأن عوّدت للتراب ترابي اولى بي

هذا ترابي وأنا زبن الجلاويه

وكنوز قارون ماتشريك يا ترابي

سقوى سقاه الحيا وقتٍ مضى ليه

يوم الرخا محزمي وزهابي زهابي

يوم ارضي المسقوي عالوسم مذريه

ودون اللحى فرخ بلجيكٍ وشبّابي

يوم إنّي اغمض مريح البال جفنيه

قبل السهر تستبيح جيوشه اهدابي

من قبل ماشوف وقتٍ دارت رحيّه

وضيوف (بقعا) سرى وقفوا على بابي

وقتٍ ليا ضحك نابي جات بلاويّه

كنه حرام علي الضحكة بنابي

قد لي خلاوي 8 سنين وشويه

هذا وانا لاني بمجرم ولا ارهابي

احدن بكى ميته واحدن بكى حيّه

واحدن على الصدق عاش ومات كذابي

احيان أهيجن وأغني للهواويه

وأحيان كل الهواويه تغنّى بي

واحيان احصّل لي من القايله فيّه

وأحيان من حرقة القيض الله ادرى بي

رهنت لي بندقٍ في دين جنبيه

وش يآخذ المرتشي من ذمّة مرابي

ظامي وورّدت بيرٍ دونها الحيّه

الله يجازي زماني ويش سوّى بي

رزقي على عالمٍ جهري وخافيهّ

ومن مثل ذا الجود رزاق ٍ ووهابي

وين انت يالحزن ؟ يا اجمل غناويه

أذّاني الهم بغيابك وشقّى بي

من بين غيّابي ابطت بك حراويه

فاقدك ياأعزّ غايب بين غيابي

وين انت ؟ ياصاحبٍ ماولفني زيّه

ياقو قلبك تخلي الهم يسلى بي؟

ودّه اشقق ثيابي غصب بإيديه

والله لأموت ويدي ماشقّت ثيابي

ودنيا الهبا سوّّد الله وجهها فيّه

أبرد صودايفها ياما احرق اعصابي

يرضيك بالله؟ تبيّت بي على نيّه

قبل اتعشى لياليها تغدا بي؟

هيّا تصدّق كذا وبدون ماريه

استنزفت كلّ جرح ٍ قد تخبّا بي

خلتني أهجّ واعطي الخبت رجيه

والعجّ راح بصميلي وأذهب ركابي

ثم ادرجت بي مهامية الزرّاجيه

وجت بي وأخفّ الطعون شلاف وجنابي

يرضيك يالحزن؟ تجهر بي علانيه؟

حتى تهاون بحالي اقرب اصحابي؟؟

وجدي وجود اجوديٍ صار عاريه

هذا وهو من ولد عتّاق الأرقابي

وجود محكوم ماقبلوا منه ديّه

وخلوه مابين سيف ونطع ونصابي

كلن تتقى طعون عداه غدريه

وأنا الوحيد اللي طعوني من احبابي

وأن مت قولوا لفاقدني وداعي

والله ماني ردي وقتي تردى بي