يالسراب اللي بهت عين الظما واغتابها

كلّنا جينا ظمايا ياسراب المهمهيه

دام خاينة العيون تجيب طيف احبابها

ليش اسميها العيون الخاينات وهي وفيّه

قالوا الشيبان : دام أهل الديار اولى بها

كل حصني قال يوم اقفى العنب : لارحم حيّه

الأصايل بالسبق تظهر بطول رقابها

لا تحسّب كل خيّال ٍ سرج بنت العبيه

والبنادق لو تشابه يختلف شبّابها

والمقمّع لاتهاونها تراها بندقيه

قلت ابأنشد واهل مكه يبخصون اشعابها

قبل ماتصبح عروش القلب قفرا جرهديه

الوعود الكافرة دايم تشرع بابها

بعضها طهر الحرام وبعضها من بعض غيّه

كل ما خايلت برق ٍ قلت ربي جابها

وكل ماساق الصبا ريح الخزامى قلت هيّه

مابْرحت عين الوله ترقب رفيف ثيابها

تقْل طفل ٍ في نهار العيد يتحرّى هديّه

واقبلت في وقت روحي هيجنت لغيابها

وابتدت بالقزوعي ثم انتهت بالسامريه!

لعنبو قلبٍ ليا ضحكت وسال لعابها

ماغرسها بالقصايد في روابي نرجسيه

السواد اللي رقد باهدابها يصحى بها

والتقى الضّدين فوق اوجانها شمسٍ وفيه!

قلت يوم تلعثم رضاها بهمس عتابها

كل عذبات الثمان فداك يا أعذب ثنية

واسحبت يدها من أيدي قلت انا وش صابها؟

ذا خجل ؟! او خايفه لا تجرح الحنّا يديّه!

اتركي يابس يدي يروى نديّ خضابها

سايقٍ ربي عليك … إنّك تخلّيها شويه

واطلبتني ثم عضّت بالبرد عنّابها

وذبت في نشوة( يزيد) وقلت من ذيّه وذيّه!

خذْت قوسي بارمي سهامي بوجه احرابها

خبْري بْها روّحت مني اثِرْها جات فيّه!

قلت زيديني … جروحك ماحسبت حسابها

جرح واحد مايكفي زودي يالاجوديه

الهجوس اللي خنقني عجّها وترابها

لعن ابيها من هجوسٍ طلعت اذكاها غبيّه!

ابحرت بي في بحورٍ كشرت بانيابها

كل ما طبيت بحرٍ هاجت امواجه عليّه

جمرتينك لا غدت مطْلب وانا طلاّبها

قلت انا مجنون راح يعالج الكيّه بكيّه!

ظامي ٍ لا شاف ذاك البرق ناض بنابها

يحترى من ثغرها وبْل المزون العقربيه

ياسراب المهمهيه قلتلك باروى بها

ارتويت وموت ظامي ياسراب المهمهيه