يستشف ( الضايق ) شعور الرحابه

لا وقف ( تايب ) على ابواب المساجد

جعل ما لي غير دعوة مستجابه :

تنقبض روحي وانا خاشع وساجد

وجعلني في عين ربعي والقرابه

نايف ومستور ومشبّب وماجد

أخلق من الشعر للضامي سحابه

وللمسا شمس ٍ من خيوط العساجد

وفي زمان اللامحال ولا غرابه

صعب تلقى ( قلب حي ّ) .. وصعب تاجد :

واحد ٍ يردع صديقي عن غيابه

ويبلغه عنّي ليا عض النواجد

الصداقة ماهي بشعر وكتابه

الصداقة : موقف وفعل وتواجد

أسمي و جهدي على راسه عصابه

لا هجده من الزمن والضيق هاجد

مير .. لا صارت قصيد وما يشابه

يرخيّ الدينار .. والشعّار واجد !!