يالله ياعالم خفى الانفس وماكن الضمير

تشكي عليك الخلق بلواها وقوّ آلامها

ياللي عبادك تحت ظلك تستظل وتستجير

من حر شمس ..عيوبها وذنوبها وآثامها

نلوذبك عن شر بقعا اللي رحاها تستدير

ونعوذبك من فتنة الدنيا وسوّ اوهامها

تغرّنا في غيّها والعمر محدود وقصير

ومارد الانفس للقبر مهما تطول ايامها

بشر ويجذبنا لتكرار الخطا سلك الحرير

نورك مُبين ومن جهل نشفق على ظلامها!!

ولاينفع الإنسان في اليوم العبوس القمطرير

إلا فعول الخير في دنياه كم ارقامها؟؟

يارب.. وفقنا وسهلها ولاغيرك نصير

لاغرغرت روح البنآدم وبلشت بانسامها

يامفرج الكربات و الضيقات والامر العسير

فزعتك قدام القلوب تموت بيض احلامها!!

جمّلني في عين الصغيّر من قبل عين الكبير

وساعد اهجوسي ابمعانيها وحسن الهامها

من دار اخو مريم عنيت احث رجلي للمسير

جيت لطحاطيح الرجال و وقفتي قدامها

ودي بها !! في وضع ماهو نفس هذا الوضع !! مير:

لأيامنا دوراتها وللظروف احكامها

سلام ياهل الطيب والناموس والسيف الشطير

يانسل سادات العرب وابطالها واكرامها

ياهل القنا و اهل الثنا والعز والمجد الوفير

يالابةٍ مقام راس النايفه مقامها

بقوم .. روس القوم .. والامجاد في فيّ وهجير

عنوان عز الجيره وسقم العدا وكعامها

(ظهور السواني) معلمين الترك معنى زمهرير

جحافلٍ قدامّكم شكت برود عظامها

اليا رضيتوا كن لسنين الزمن وجهٍ سفير

واليا زعلتوا تزعل ايام الزمن واعوامها

وسلام يالسميان ياهل الخيل والصيت الشهير

صفوة ميادين الوغى لاثوّرت بأعسامها

آلاد سامي .. منبع الطالات لاصاح النذير

ستر الهنوف اللي تعزوى في فعل ضرغامها

اليا ركبوا قبّ المهار ودكّوا الجمع الغفير

تبرك زحازيح الرجال وتعلن استسلامها

لابة شرف .. من يعترضها بالردى ماهو بخير

من طيبها ضامت زمان الشده ولاضامها

اليا عطت كنها تغرف من جمة البحر الغزير

واليا خذت قادت ذلول الكايده بخطامها

يامعتقة دم الدخيل .. مجبرة عظم الكسير

انتوا خوال المرجله والطايله عمامها

تكفون يارجال الكرم في جاه الاول والاخير

تمّوا طلبنا يامقابيس الوغى واعلامها

تكفون ياروس الرجال اللي تشور وتستشير

ردّوا على أم اليتيم اغلى واعز ايتامها

تكفون يانطّاحة القاله هل الخير الكثير

تجمّلوا في اللي حضر عوامها / حكامها

تكفى يافيصل تمّها في يديك تحديد المصير

ناسٍ تبي الجنه على هذي تحث اقدامها

يابو سند مال الكبيره كود رجالٍ كبير

ومثلك سند للمعضلات وشيخها وحزامها

تكفى عسى ينساق لك من جنة الخالق بشير

يعوضك الله بالجنان الخالده .. واختامها :

قل تم .. تكفى ياسليل المجد والصيت الشهير

رجّع على أم اليتيم اغلى واعز ايتامها !