ماني على خبرك على قول المثل خبرك عتيق

عقب الصخب والطيش حبيت الحياة الهاديه

صديت و النيه مطيه والعمر رحلة طريق

يا رب رحله ممتعه من فوق صفراً عاديه

زهابي الايمان وسلاحي على الوصف الدقيق :

عقليّة المثقف وفراسة ابن الباديه

كان منعتني خونة الصاحب وخذلان الرفيق

فـ انا كفو لايّات هجمه من جهات معاديه

تبجحي يا نظرة المستقبل بماضي عريق

على الظنون المظلمه شمس الحقيقه باديه

وتثاقلي يا خطوة المتجوّد بعهدٍ وثيق

حتى ولو متناقضات الميديا .. متماديه

احياناً من اصغر شراره تقبس الدنيا حريق

واحيان تنبش اعمق جروحك حمامه شاديه

كم من محبه صادقه تبدّلت كرهٍ عميق

باسباب مزحٍ ما هو  بوقته وكلمه غاديه !