يا الردي على الردى مثلك يشيب

تكبر ويكبر رداك وتمتلي..

الجهل ما عالجه طب وطبيب

ذا بلا.. والله يعين المبتلي..

باتغاظى عنك واتحاشى واغيب

عن شعيبن عافته قدم جملي..

ماني مجبورن اعيشك كالنصيب

لا انته من ربعي ولا انته من هلي..

واعرف ان ضيقي على شرواك طيب!!

واحسب احساب المعاني وزعلي..

جابك الله وهاجس المعنى قريب

انتهض شعري وانا ماني خلي؟!

عندي فكرة بيت ما ودي تخيب

ولّعت قافي.. وعانه يصطلي..

وانت هالمره ابي تصبح لبيب

افهم احساسي وترجم مايلي

الذيابه ما تخاوي كود ذيب

و(الثعل) شرواك عنه تعتلي..

فلاتحاول تعتبر نفسك صحيب

لان هالصحبه ترى عيبن علي..

ذاكرك ضيقي مع الليل الكئيب

ولا تظن ذيك السحابه تنجلي..

خلها على الولي.. والعيب عيب

واسترح وارتاح .. يا عبد الولي ...

وكان رمياتك مع غيري تصيب

فعرف ان العيب ما يصيب سهلي