ونعس الشاعر المأفون علي الآي فون
وذل الشعر "للايكات"
وزي ما كان خدوه من فوق
رفاق "السوق"
خدوه من تحت
رفاق الفحت
ما كانش معاه رصيد يكفي
عشان يغنيه
عن استجداء رضا اللي ذلوا أحلامه
وهالوا الوعظ علي أغانيه
..
أقولك إيه كلام يرضيك ويرضيني
ويرضي المقطوعين ع "الفيس"؟
حتيجي ازاي؟
ماليش قلبين ف تكويني
واخاف الموت يوافيني
وانا خسران "وجوه ع البحر" نورها القمر ف الليل !
يا شيخ ارحم
ده حتي الموت ماهزش برتقان روحك
ولا تحت الشجر سلاك
بموال البنا المهدوم
علي الناس اللي حلمت يوم
تقابل غنوتك في الجاي
شربت ازاي مع الشُهدا كاسات الشاي
ولما كنسهم النسيان
رقصت ف حفلة القاتلين؟
..
كهين.. وعجوز
بتولد زي شجر الموز
تروح وتفوت وراك أرجواز
بنفس ملامحك السوده سواد الأرض
حزين من بره
لكن يخدع لهفة العاشقين
ويشوي بزازها لو نشفت
وجابت طين !
تموت تحيا وتحيا تموت
ويفضل عرقك الدساس
بيرضي "السيدة الاولي"
ويرضي الناس !
ذكي ولعيب
أديب ثوري وثوري أديب
ولك عند الغلابة إيدين
ولك عند الحرس هيبة !
حاتطربق علي دماغنا
ونتشرد بمكر القول
وتفضل خلفتك على طول
ونفضل إحنا ف الخيبه!
..
عيالك يا شيطان الشعر
علوا مقامك الهبطان
وعرفوا السكة للعصيان وللتوبة
فنام ف سلام..نام ف سلام