1
منهم أمّر من حنظل القبور
و منهم ألذ من حبق الجسور
حظ و نصيب، مفيهوش شطاره
ولو تاخدهم تجاره العمر كله يبور
2
منهم كما مننا المُرة والمزة والمُر والأمّور
زى القماش فيه حرير وفيه البفته والدمًور
ياللى نويت ع السلامة، حاذر تجرب ألامى
" م الآخر اسمع كلامى "الصنف كله يغور"
3
  أول ما تعطس تبوسك عشان تجيبلك كورونا
 ستين سنه كنتوا فين ؟ ده انتو نشفتونا
خدنا خلاص ع العطش، عجبنا طعم المرار
إحنا شجر صبار، من غير هزار "فارقونا"
4
طبيعى تيجى “الكورونا" للعالم المختل
تجار بتنهب شعوب ف حماية المحتل
و ناس بتقتل ناس ع الكفر أو ع الدين
 لازم يموت ملاين؟ عشان نفكر ف حل؟
5
كورونا مين يا غجر ده رأس مالكم أمّر
شردتوا بيه الشعوب، حروب وكر وفر
عايزن كورونا بضمير بينصر الإنسان
يرجع يعيشها بأمان، بعد انهزام الشر
6
فيه فيروسات واضحة جدا حتى للعميان
القهر و الفقر، والجهل والجهر بالعصيان
امتى بقى راح تهمدوا يا مطلعين عين أبونا
إيه تانى بعد "الكورونا"، يأدب الإنسان؟
7
يا كورونا حس، وخلى عندك ضمير
إيه اللى ريحك حتاخده من بلاط الفقير
جسمه اللى نادره الزمان للغلب والتريقه
ولا جمال بسمته ف الشقا و الهجير؟
8
حبة قرود كدابين بيقرّعوا على بعض
يتنططوا ف الهوا ويتشقلبوا على الأرض
مالى ومال فرحهم وأنا قرد إنسانى
 منعتنى أحزانى، إنى اشترك ف العرض
 9
آه لو كورونا " مناضل" ضد راس المال
يجيب حقوق الغلابة وينصف العمال
تبقى بلاد واحدة،  و كل البشر شركاء
 ودنيا من غير غباء ولا بلطجة واحتلال !!
10
 آه لو " كورونا" مناضل بس " مِطوّع"
ما هوش   لبط قبّيض ومتلوّع
إنسان عزيز النفس م الأول
عمره ما يتموّل لو اتعرى أو اتجوّع  !!
11
فى " الحبسة" تتأكد شكوك وظنون
البيت يا إما وطن أو بنسيون
واجهت نفسك فى مراية البيت؟
عرفت ليه ضحيت بالعمر يا مجنون
12
إيه اللى خدته لما بعت هواك
وقتلت شياطين الفرح جواك
اشرب بقى وحدتك ف الصمت
 انت اللى خبت، عملت فيها "ملاك"
 13
خدت الكورونا مننا راقة
ماكانش تحت الراقة غير أحزان
لقيتها طبعا مرة حراقه
جريت وقالت " حسرة ع الإنسان
14
واجعنى  قلبى  قوى على بشر  حبُّوها/
هيه نِستهم وهما العمر ما نسوها/
لكن أكيد.. معذورة هيه كمان/
ما هو برضه شياطين الزمان هدّوها
15
لا لاقيها م الاصحاب ولا الخوات
"الصُرم طالع" من جميع الجهات
وانا مش برىء، أنا زيهم معلول
"فيرس" علاجه يطول، اسمه عبادة الذات
16
كلتوا بضميركو حلاوه دى الوقتى راح تبكوه
بعتوا العراق واليمن والسورى شردتوه
أهوه جالكو رعب الموت وجريتوا ع الدروشه
والله لولا الخِشا لافقع لكم " أ..ه"
17
سامحنا ف العمر اللى فات يا كريم
إحنا ارتكبنا المعاصى بس كان تلطيم
إدينا تانى برحمتك يارب عمر  جديد
 ولو سقطنا، نعيد ونكمل التعليم !
18
يارب عفوك سامحنا،ياما فرحنا و نسينا  وعصينا
و ياما انجرحنا و داستنا أحزان الحياة وعيينا
وانت خالقنا وعارفنا وكل شيء فى حكمتك وب إيدك
واحنا عبيدك غلابة، غلبنا الشيطان، ضلينا !!
19
يا كورونا اقولك تِحش مين الأول:
نصير طغاة ويمينى ضد الحياة وشِمالى مِتمّول
زُعمة دكاكين السياسة/ تُجار مآسى الجوع
سامعنى يا مفجوع؟، حّول!
20
الافترا ف الامتلاك عمى قلوبنا وعنينا
طمعنا ف المواريث وكلنا بعضينا
عايزين هنا /عايزين هناك
مع إن ساعة الهلاك المتر يكفينا !!
21
ما العن الخوف إن حكم..صدقت يا بو بهاء
مفيش "ضمان ف الأرض" بس إحنا مش تعساء
انت اللى قلت الضحك ساعة الموت يهد العدم
ورسمت " وردة بيت وطفل وعلم" وهتفت للشهداء
22
فيه ناس تقول إنك تحور لولبى
وناس تقول إنك تآمر أجنبى
لكن أكيد منتاش عقوبة ربنا
هوه خلقنا وحَبنا بس احنا تفكيرنا غبي