من الكباير احترام القرعجي و الفسل والابتسام الدبلوماسي ف وش ابو جهل دول كلهم ،مالهومش ف الحياة لازمة رغاوي أزمة، حتخلص، لو يفوق العقل من الكباير مجاملة التافهين باسم التواضع،أو باسم الدين ياما جرالنا م الحلول الوسط ياما بلعنا الزلط،ومش عاجبين. انا يوم ما شفتك قلت الف صلاه علي النبي وآله واللي اتبع لهداه ماهو جمالك من معجزات الكون وهداية للمجنون،واللي شيطانه غواه إجمل ما فيك انت إن الفصول عرفاك وانك دفا ف الشتا وف الربيع شباك وف الخريف احنا ورق وريمته وياريته كان يفضل طول السنه وياك ومن الكباير، تواضع للي ما يسواش خدام طموح أسياده و الأوباش جعجاع مظاهر الهيصة و التأييد اللي عايزنا عبيد، ودماغنا ما تعلاش ومن الكباير سندة الأندال دلاديل كلابها وعبيد المال مالنا ومالهم واللي بيساعهم يارب تبلعهم، شقوق زلزال ازاي ابص ف عنيك وما اكتبشي عن الحنان والأمل اللي مايكدبشي مش فرفرة أحلام، الحب ف الستين ومش حرام،مدام عاقلين ما بنعيبشي ومن الكباير كبت المشاعر وكتم القلب والخجل م الحياة، والشعور بالذنب خلي الغنا مطلوق،طول م الأجل محتمل مفيش حدود للأمل،مهما الزمن كان صعب مش باقي ع المعاش غير حبة شهور وبعدها مفيش لقا ،غير ف إشارة المرور بس أوعي تتخض لو مديتلك المناديل: يسعد صباح الجميل،يومنا فرح وسرور ومن الكباير لو رمتلي مناديلي وقسيت علي غنايا ومواويلي وصدمت قلبي ف دوسة البنزين اشكي ساعتها لمين، ومين حيبكيلي؟ ان جيتو للحق،كل الشعر ده مكتوبله عايش بذنبه، ازاي انا راح اتوبله؟ شوفولي حل،أحبه وادفع الكفَّاره أصل العباره،أنا قتيل حنيته ونبله ان جينا للجد، تلات اربع الشعرا دول أوغاد والربع بيشاور ومستني يجيله ميعاد لو عُشرُهم وبحق، كانت البشاير هَلت لكن المشاعر قَلت،والتجرمة ف ازدياد اياك تصدق ياطيب،لو بلطجي،يبتسم يدخل ف عبك،يلبك، علي قفاك يترسم عايز تجيب آخره،ركز شويه معاه شوف الاختلاف وياه، ازاي بيتحسم؟ لو محتارين قلبه عليها ولا هوه علي قلبها؟ شوفوه بيعمل إيه مع أي حد بيحبها شهوة الافترا بالحب، ألعن من الكراهيه والبنت مصرية،ف كل أحوالها، بتحمد ربها لو أحبك اكتر، قلبي حيوجعني ده غير دماغي بيسخن، ممكن يضيعني معادش اصلا مساحة لحد غيرك فيَّا انا اصطفيتك ليًَا، يا تري بتسمعني
سمير الأمير شاعر ومترجم مصري، صدر له عدد من الدواوين الشعرية ومنها: "برة المجرة"، و"مجرد رد فعل"، و"تفاصيل حلم ما كملش"، و"شعر أو لا شعر"، وله العديد من الأبحاث في ...
