اغنم شبابك  قبل تفنى  تواليه

ماينفعك  لاشبت كثر  الندامه

من لاكسب صيته على اول خطاويه

ماهو   بكاسبها   ليوم   القيامه

واعرف ترى الإناء ينضح بما فيه

ان طاب طاب  وجنّبتْه  الملامه

وكانه تردّى يحقرونه  بني اخيه

ويحقْره من يسرح بوادي تهامه

حتيش لو حاولت ولّا تبي فيه

يبقى الهلامه .. لوترزّه  هلامه

ارفع مقامك والعتب والمشاريه

وصح الله منطوقك ووفّر كلامه

حنا نحَشْم وْجيه ونْهمّش وْجيه

والرجل فعله من  يحدد مقامه

رجلٍ كفو  للنعْم لاحلّ  طاريه

ورجلٍ ورا طاريه وانتو بْكرامه