سلمى يا ملحٍ قدْ تلاقى بسكّر

يا منزله بالحب فاقت لهيبه

ويّاك يرقى احساس عمري ويزهر

ويزداد فيني العشق ويفوح طيبه

عِشتك أماني في حشا الروح تكبر

وشفتك معزّه معْ شموخٍ وهيبه

صافحت كفّك لين كفّي تعطّر

ورده تفوح الطيب ماهي غريبه

سلمى ولوّنتي المدى بلون أخضر

وصرتي ابتسامه في الليالي الكئيبه

لمّا حضرتي كل هالكون نوّر

كِنها نجوم الليل منّي قريبه

واليوم جيتك نبض من قلب يشعر

يهدى ثلاث وْرود تزهى بطيبه

ورده تودّع عام بالحب سمّر

ورده تهنّي قلب إنتي نصيبه

ورده أخيره لك تقول وتعبّر

كل عام وانتي بخير يا أغلى حبيبه