لما يمطر فيض زلالك
ويطوي ليلاً داجي حالِك
نلقى فيك...
كل المواعيد تتلغي
كل المسارات ترتقي
بيك ينشرح قلب الحروف
تتناجى بالريد النقي
*   *   *
كانت وراك
كل المساحات مستباحة
والملايين البتهتف
ماخدة من حبك فصاحة
ارتدت شعلة وميضك
واكتست نورك سماحة
يا العشانك
صحوة الشوق تبتسم
ويحتوي الفرح النهار
تحضن الزهرة الفراشة
ويرسم الموج انبهار
ويرجع الهمس المتيَّم
يكتب النغم السعيد
في براحاتك عشانك
غابة تخضَر من جديد
والبحر في لهفة واقف
نبرتك في صوتو شالا
يلقى في عيونك مرافي
وفي صَدَف صُدَفك بسالة
إنت يا صورة وطن
ألوانا  من صدق الأصالة
لما يمطر فيض زلالك
لما يمتد فَيْ ظلالك
نلقى فيك...
كل المواعيد تتلغي
كل المسارات ترتقي
كل الصباحات تلتقي
مبهورة بي حسن الغزالة