يا سيدة يا ست الشعور الما نضب
فتشت ليك
في كل حارات القوافي
وفي القصيد الما كَضَب
وسألت عنك
كنت دايرك تطفي بالريدة اللهب
يا أصفى من كل الصوافي
وأحلى من طعم العنب
*   *   *
بسمة فرح منك تطوف
تغسل من المدن التعب
بتفرِّح المتعوس سنين
وتودِّر الشين الكعب
يا سيدة الزين والسماح
يا غالية زي مجلي الدهب
يا أصفى من كل الصوافي
وأحلى من طعم العنب
*   *   *
يا سيدة بكتب ليك حروف
وأجمل حروفي الما انكتب
يا أسمى من كل المعاني
وأعلى من كل الرتب
فرحان إليك الغيم بسافر
ويطرب البلبل يغني
وتسقِط النخلة الرطب
يا أصفى من كل الصوافي
وأحلى من طعم العنب