ياخف قلبٍ فر واخلى مكانه

بيح عزاه وزاد منه اخفقانه

على الذي خف القلوب اخزرانه

هيهات واسمع للملا مايقولون

قال الحزين الي تهيض بالامثال

عينه بكت والدمع من حجرها سال

على الذي ماشفت نشره ولا زال

ماتذكرونه يامناديب تكفون

قالو تريح ياحسن من عذابك

لاتبدي المرقاب ينقص صوابك

مجنون ليلى صابه اللي جرابك

سموه يوم اخلى من العقل مجنون

قلت اعذروني ضاع ميزان الافكار

وانا على ماقدر الله صبّار

عيني بكت والله رحوم ٍ وغفار

على الذي من هرج الانذال مصيون

نصحانكم لي يامناديب مافاد

وانا لمن زانت معانيه ودّاد

والقلب له كثر الهواجيس معتاد

على الذي منه الحجاجين مقرون

عزي لحال ٍ ماتسره الاداوي

على الذي حبه غدالي بلاوي

ولا غدالي صوب غيره نحاوي

عليه قلبي بالهواجيس مشطون

لا واعنا قلب ٍ عذلته ولا تاب

والعين حفيت من مراعاة الاحباب

على وليف ٍ اعترض لي بالاسباب

واقفى وخلاني حزين ٍ ومشحون

باون لو مامن ونيني مسره

والقلب مني فر واخلى مقره

على الذي مالي عزا من ممره

ليته يبيعونه ( بلكين ) مليون

ياونتي منها مشطة زماني

والثانيه كثر البكا والتماني

والثالثه فرقى حسين المعاني

والقلب عنده دايم الدوم مرهون

باح العزا والشيب في عارضي لاح

على وليف ٍ عرض القلب ماشاح

احسن شخص ، ماهرجه كل مزاح

ولا مشى في درب الادناس مضمون

ابكي وليف ٍ شد وابعد رحيله

وشطت بنا الدنيا بفرقا طويله

ضيع دليلي ضيع الله دليله

خلاني اسهر والمخاليق يمسون

ياونتي منها تكسر ضلوعي

وابرى القلم ورفى همايل ادموعي

على الذي فينا بوصله قطوعي

مظنون ماغيره من الناس مظنون

ياونتي منها تنقض صوابي

على وليف ٍ لانوى لي عذابي

عرّض وكنه غافل ٍ مادرى بي

واغضى بعين ٍ كن بها حد مسنون

البارحه قلبي تهيض بونات

ولا جداي الا البكا والتنهات

ولا اتشالى كون من بدع الابيات

واكني الونين اذل الانذال يدرون

ابكي وليف ٍ راح اقفى وانا اقفيت

وياليتني من طول فرقاه سجيت

لامن ذكرته في حلا النوم فزيت

والقلب مابقّى من السد مكنون

عيني بكت واسبابها ناعم العود

ولا قتلني مثل ابو حجة ٍ سود

اللي برى حالي بهمً ومقصود

والى نشدته قال مادونكم دون