وكأن ضِحك
اِفرد الكوتشينه
خُد لك سيف
وادينى سيف
اسحب كارت
وكمان كارت
ادينى الجوكر حىّْ
وهوه بيهدد ملك الشطرنج
ف الحرب الاخيره
بموته لطيفه
لوزير وفيل وطابيه
ف خبطه واحده
وبيحميه ف اللحظه الأخيره
بكعبلة العساكر ف بعض
ويمنع الترقيه
للدور الكبير
الجوكر ابن الكلب
قليل الأصل والذمًّه
مصاحب بروتس
وعلى الزيبق
وخالق حروب
بينهيها بسهره وكاسين
خدلك سيف
وادينى سيف
وانزل ع الأرض
بشايب رزل
معكنن الكوتشينه
بكسوف البنت
وخوف الولد
ووراه الجوكر
يحمى غزل الولاد
وهى بتقُش الأرض
من كل الكروت
والبنات تضحك
الجوكر ابن الملوك البكرى
وموًّنس عماهم
الجوكر
صاحب ولاد البلد
ورسول البيت العالى
بيحب دور البطل
لو حتى شرانى
ومالوش ف الضحك
خدلك سيف
وادينى سيف
طاب كرت
وكمان كرت وكرت
مش عايز جوكر
وعارفه ....
أول كرت
حتنطُره ايدك
ف حواديت اللى
عمرُهم حواديت
الجوكر
شيبوب
عمر العيّار
الجوكر
شيخ الشبِّيحه
امراضى اليتامى
الولىِ
صاحب الكرامات
الجوكر
ليه ف الضحك صنعه
ودمعتينه
يجرُّوا الدم لو قَصده
الجوكر يمين
وكل الجواكر شمال الشمال
الجوكر
المريد
الجوكر
شيخ الجامع
الجوكر
مات ف المظاهره
الجوكر اللى كان بيرمى القنابل
ويغرق ف دمه
وسط الجموع
الجموع الجواكر
ضحك
وحزن
كأنه ضحك
أول ما قلبك يصدقه
راح يحدفك ف عياط
 الجوكر
ارمى الكوتشينه
بجواكرها
واسحب سيفك من كل اللعب
الارض
بتحبه
وبتكره كل أدواره
وبتحب الضحك
والكوتشينه
من غير الجوكر تلعب
والجوكر من غير كوتشينه
ما يلعبش .
(2014) من ديوان شبه الحُزن