دوون الغموض وفوق سقف المفاهيم

تعلقت روح العظيم العظيمه

مزاجها في خلوة الناس تسنيم

تلعن شياطين العقول الرجيمه

اسقى الله الغاوي معي كل ما ديم

يمهل وينبت من خصيمي خصيمه

ما كانت الكلمه ولا كنت كلّيم

لو ما تخالط في هميمي هميمه

تضرب لي المندل براسي تقاسيم

واضرب على رقبة المجنن تميمه

مستخلف الخضراء بشاش وتجاهيم

ماروم نجمه من شليله وغيمه

صلاة من رب المعاني وتسليم

على تفاسير البيوت اليتيمه

هيهي خناس ولا تقولين حم

اخاف لا تكبر عليك الجريمه

الناس عقلياتها بالملاليم

وداعتك ما عاد لصرف قيمه

شوفي ليا قلت الحبوس المظاليم

وشلون يفهمها غشيم وغشيمه

وش حاجتي بهدي رئيس المراسيم

ولا ناسه زي ناسي سقيمه

موتوا قهر واسمى تحيه وتعظيم

يكسي كريمك يالطبيشي كريمه

طاول معاليك القروم الشغاميم

للمنحنى والزاويه المستقيمه

على كثر مالك خصوم ومغاريم

يمي عواصيف الكلام ونسيمه

قوم غدت بدحيم يا طلبت دحيم

رد البهيمه لا تروح البهيمه

يروى بعير القيظ وقلوبهم هيم

مني ومتحسف عليهم شتيمه

جيرت بيس طبوعهم لي تناعيم

وإلا القرابه سكتتي عنه شيمه

هزيمه تكشف قلوب الغظاريم

مع مرها يا حلوها من هزيمه