ثلاثين عام اكملتها كل ابوها كد

طموحي زروع ماتثني سنابلها

ثلاثين حول أقول انا لليالي ند

ولا ادري إلى ناديتها كيف اقابلها

ثلاثين خلتني اعد الليالي عد

ايلين اختلط حابل دروبي بنابلها

سنيني سف غربه مسافات حط وشد

وطرد ورى حلم على الكبد دابلها

صباحي كفيف مالقى للمنافذ يد

على ساعده تلوي الليالي محابلها

دروب الليانه صدت العين عنها صد

وكن النكد والكدح والكد طابلها

سنين اتحرى في ضفاف الليالي مد

على الباب انادي غيمة زل وابلها

ولا ذقت من صلفات الايام غير البرد

يصالي ورود داخل القلب ذابلها

قفار مساريها تهد العزايم هد

الى جيت ادوس الشوك ثارت قنابلها

يقول الخلي لا من حداك الزمان فشد

وانا اخاف لايام المتاهات ادابلها

تعبت ارخي حبالي و كف الزمان يشد

وانا عيشة الحقران ماني بقابلها

لك الله ماطردي ورى مايسات القد

ولا ادمت جروحي طبلة مات طابلها

ثلاثين صيف ازرع بلاد اليباب الجرد

زروع عطت لكفوف غيري سنابلها