دك هاونك يا حزن ... واسحن بكايا الحيل
ثلاثين عام وحمد ... لا مر ولا اجه الريل
دك هاونك يا حزن
خليني اسمعك ترن
مامش بعد كل رجه ... يوصل قطار الليل
دك هاونك يا حزن ... واسحن بكايا الحيل
***
يا حزن دك هاونك ... خلّيهم ايسمعون
أحباب الي من الجهل ... عالسجّه ينتظرون
يمكن قطار القهر
يوصل يصيح ابقهر
والقهر فرّخ قهر ... والريل ، ماجه الريل
دك هاونك يا حزن ... واسحن بكايا الحيل
***
وك يا حمد يا أمل ... بعيون الحديثات
شماله قطارك عطل ... ما وصل لام شامات ... ؟
خانتك سجّة هلك ... ؟
لو ريل ليلك هلك ... ؟
ننشد نريدك تمر ...والله نشيلك شيل
دك هاونك يا حزن ... واسحن بكايا الحيل
***
للّيل لسعة شمس ... والشمس بردانه
والروح نخله بجرح ... من اسنين عريانه
وينه الينشف الدمع ... ؟
ويسمع الماينسمع ... ؟
غص الكلب بالصبر ... شنصبر بعد يا ليل ... ؟
دك هاونك يا حزن ... واسحن بكايا الحيل
***
يمته تمر يا حمد ... ويّاك النه عتب
ثلاثين عام النخل ... شيّص ابعثكه الرطب
والنهر يبجي الراك
وعراك يبجي اعراك
لا بالمحطه رف ضوه ... ولا بينه من شم هيل ... ؟
دك هاونك يا حزن ... واسحن بكايا الحيل
***
وك يا حمد يا شذر ... يا موكد الجمره
جنّك كسرت الجدم ... يابو زند سمره ... ؟
يا حيرة البالكلب
مثل المنيّه وتدب
بارواح اهلنا الكضت ... سنبل واخذها السيل
دك هاونك يا حزن ... واسحن بكايا الحيل
***
حزنن تراجي الفرح ... والدمعه هلهوله
وخزّامه صار الصبر ... والمستحه سوله
شطولك يا ليل الصبر
تشبه عذاب الكبر
موته وبعدنه بأمل ... يوصل قطار الليل
دك هاونك يا حزن ... واسحن بكايا الحيل
***
الكطا رفّ الجنح ... ومثله العراقي طار
لا سنبل ابدا بكه ... ولاظل وطن لا دار
حتى الفخاتي ارحلن
بطوك الحزن سافرن
وشاخ الضبع عالسبع ... وجالونه بالهم جيل
دك هاونك يا حزن ... واسحن بكايا الحيل
***
آنه ارد الوك الحمد ... ما الوك انا الغيره
كالتها وتندمت ... وطاحت بالف حيره
من شافته ما أجه
وما بيه أبد كل رجه
صاحت عليه اشتمر ... عن سجّتي يا اسهيل
دك هاونك يا حزن ... واسحن بكايا الحيل
***
زخّن ليالي الحزن ... جيلات فوك الضلع
والفجر طش حمرته ... بعيون اهلنا دمع
طلكنه والله الصبر
ورحنه مشي للكبر
ورفضوا دفنّا بعذر ... الدفان ما بيه حيل
دك هاونك يا حزن ... واسحن بكايا الحيل
***
للصبح فزّت نهد ... وكطرة ندى الحلمات
ومورّدات ابغنج ... فوك الكلب حسرات
يا حلو يا شكرلمه
حن اعله من السمه
ما ظل بعد بالعمر ... موشّل تره توشيل
دك هاونك يا حزن ... واسحن بكايا الحيل
***
شهكه اعله شهكه العمر ... حدر الكناطر كضه
وضلوعنه من الهظم ... كلها تره مرضرضه
بوس الألم يا جرح
وتوالف ويالجرح
فرسانّه اتكوطروا ... وعريانه اجتنه الخيل
دك هاونك يا حزن ... واسحن بكايا الحيل
***
ملّينه ريلك حمد ... عالسجّه منتظرين
ورحنه باجفان الدفن ... للكبر متونسين
بس ما لكينه كبر
وردنه نأجر كبر
كالوا تره المكبره ... ما بيها أنج ايشيل
دك هاونك يا حزن ... واسحن بكايا الحيل
***
كلما يزيد القهر ... للفرح دكّت باب
وكلما يكون العتب ، خنجر ، نظل احباب
والقصّه قصّة حمد
وريل انكطع للأبد
لكن نظل ابرجه ... يوصل قطار الليل
دك هاونك يا حزن ... واسحن بكايا الحيل
ثلاثين عام وحمد ... لامر ولا اجه الريل