سود العيون او ذا عقيق ن يماني

بثلج المحاجر في شتاء ليل الاهداب

قد سلهمت لي ثم فقدت اتزاني

وانا الرزين اللي عن الحب قد تاب

وكنها عثاقيل من الزعفراني

جديلة ن كن الشفق وسطها ذاب

وان مالمست اطرافها ما هناني

زاد ن ولا ماء نافحة سحر الاطياب

ولبيه يا ذا البارق اللي شعاني

نبته مواعيد وغثى سيله اعتاب

يشعق معى البرقع ليالي زماني

واخيّله واذبّله كل مرقاب

وانعت هلي ما ذا المكام بمكاني

شدو بنا يا مال قطاع الاطناب

ويا نود هبيني تجنن جناني

وهاتي من اطلاله ولو عج وتراب

وباخذ زمانين ولا انفض اثباني

واعيش من باقي الاناودي هياب

وانا من اللي في جهنم رماني

والماء قريب وجمر شفتك لهاب

غر السحايب قطرها ما شفاني

ما يشفى الا رشف عذبات الانياب

خايف على اسمك يا فقيدة لساني

لاينبهبه من بين الاضلاع نهاب

وافرح الى الطارش بعلمك لفاني

فرحة صويبن نوخت عنده ركاب

قد أيس وقال آخر العمر فاني

وقد حافه الذيب وحجل عنده غراب

ومروه هل هجن دقاق المثاني

تداركوه خلاف ربعه والأجناب

والله جعل له عقب ضيق انفهاني

وترادفوه اللي خفيفين الأسلاب