طيب ومؤمن وصابر واحب الكفاح

صالح وعاطل ورجلٍ على نيتي

احتمل للعنا وامضي وادور فلاح

وان تضايقت قمت اجر قافيتي

الوفا والشفافية ووجه الصلاح

ينعكس نورها من نوور، عفويتي

اطلب الله رزقه فالغدو والمراح

انه العالم بجهري وسريتي

أقطب السد وامنع لكن السد باح

والليالي عثت بي وانا أخو خيتي

ياملكنا  ياملكنا ولد مروين علط الرماح

لك بفضفض وأخلي عنك رسميتي

ياحبيب العرب يا بعد من جاء وراح

طاري اسمك يزود قدر جاهيتي

والله اني احبك حب ماهو مزاح

شوف صورتك فالجوال خلفيتي

والولاء داخلي مهما حصل ما يزاح

احتمي واتفاخر في سعوديتي

اشتكيلك مدام البرق فالعين لاح

قبل لا تنهمر وتهز شخصيتي

جاني الموطن ورحبت والطيب فاح

يوم جيته سفهني ماحشم جيتي

الفقر والعطالة جرعتني ذحاح

وذبحتني وانا طلاب في ديتي

شفت يد الوطن عند المواطن شحاح

بالرغم من سخاي ومن شهاميتي

حر لكن مع فقري مقيد سراح

حر لكن ما استطعمت حريتي

عامي اللي مضى واللي دعا للفلاح

ما معي عيد الاضحى؛ قيمة ضحيتي

ذا وانا احمل شهادة طحت شين المطاح

يعني اللي بلاها يقبل تحيتي

قلت حافز وحافز مثل فية صباح

وحسدوني يابو متعب على فيتي

صعبوها وهي والله سراح ورواح

عقدوها و زادوا ضيم نفسيتي

حافز اللي جموحه حولوه لجماح

كان واقع بيدي وأصبح امنيتي

حافز اللي شروطه مثل بحر قراح

حافر اللي يحفزني " لأنانيتي "

كم شويب تعنا فالعمر ما استراح

قال ليه .!! منعوا حتى من شويتي

لا ضمان انضمن ولدي ولا بنيتي.!!

يا مدون شروطك هاك علم الصحاح

ذي حقوقي ترا ماهي بعانيتي

ضاقت صدورنا من الهم  قد هي طفاح

واعذروني على كثرة شفافيتي

ضاق مصلح وزاد الضيق زفرة صلاح

وكم صالح تضايق عند رمزيتي

الولاء داخلي مهما حصل ما يزاح

احتمي واتفاخر في سعوديتي

وان حصل شي من الدنيا رجيت السماح

سامحوا في ديوني وادمحوا سيئتي

قلتها والمقاصد والنوايا صحاح

يا عسى الله يعطيني على نيتي