ِحبيبي يوم راد الله لقيتك والجروح كثار
عيونك تبكي جروحك ولابه من يواسيها
لقيتك للاسف وحدك مضيع دربك ومحتار
سكن كل الحزن وجهك ونظراتك سكن فيها
رفض قلبي الوفي الوحدة وجا وافي لحد الدار
دوافع جيته طيبه وجت تعلن تحديها
تقول لحزنك المغرور توكل يا حزن واختار
عيون غير هذي العين تعذبها وتشقيها
وضميتك وسط صدري وخبيتك عن الانظار
وكل الهم ياهمي جروحك كيف اداويها
تركت اجمل مشاويري وجيت اكمل المشوار
معاك وصرت لي قصه حلفت اليوم لااحكيها
أنا حبيتك بجرحك ولكني خشيت العار
أجيك وتجبر جروحك عشان اني مداويها
تركتك لين ماطابت وصارت يالغضي تذكار
وجيت اعلنت لك حبي ونفسي الشوق حاديها
ضحكت وبسمتك بانت ورديت الزمن دوار
(اخيرا دارت الايام ) وانا ادري وش معانيها
ترا عمر الهوا ما كان ياعمري قضية ثار
ونفسك لجل هذا الجرح تخلت عن مباديها
حكيم وخذ معي حكمة ترا هذا الزمن غدار
وهذي قصتي وياك وخذعندك تواليها
جرحت القلب لاكنك نسيت انك جرحت احرار
وقلب الحر لايمكن حبيبي لك يعديها