احلف برب البيت ياشوق مفصول

خطي بوقت انك طلبت اتصالي

ازريت اسدد والسبب حيل مشغول

واكيد تعرفها دواعي انشغالي

عذرٍ كتبته هقوتي منك مقبول

بعده عزاي اليوم في فقد غالي

هذا القدر مافيه قوه ولا حول

والحمد لله دوم في كل حالي

انا معك وقت الشدايد على طول

اشيل حملٍ عنك كبر الجبالي

بلاش تترك خط هاتفك مقفول

هذا طلب مني اذا لك مجالي

وان كان فعلي يوم ماجا على القول

حرام مااجلس يوم بين الرجالي

معقول بنسى وقفتك ذيك معقول

يومك تواسيني على اللي جرا لي

يومك تقول الهم ايام ويزول

لا بد عقب المر ياتيك حالي

مانجحد المعروف واشكرك واقول

انا اشهد انك دايمٍ وسط بالي

ليت الحزن يجفاك ويصير مقتول

وليته يطيب اليوم فالك وفالي