ياقبر انا لاجيت يمك تمنيت

اني بداله تحت الاحجار مدفون

ودي يكون الحي عمري وانا الميت

لو الثمن كل المخاليق يفنون

ياقبر فيك اللي على ابوي سميت

دايم وانا مع قرة العين مشطون

ياقبرلو تدري بعد ويش كنيت

لتقول ليت الموت ماكان مسنون

ياقبر والله عنه مايوم سجيت

اسمع صدى صوته وانا منه محزون

كم مرةٍ باسمه على اخوه ناديت

والناس من حولي يقولون مجنون

اذكره حتى يوم فالفرض صليت

والناس باسمه لا بغوني ينادون

ماتدري انه كان لي شمعة البيت

وانه يساوي الكون والكون والكون

واني اشوفه كل ما اصبحت وامسيت

قدام عيني خطوته دوم بالهون

ماانساه لو اني دلهت و تناسيت

ودنياي عقبه يا ملا مالها لون

وقت العزاء لوي تظاهرت واخفيت

حزني عن اللي في فقيدي يعزون

لكن تراني من كثر صبري ازريت

وعقب العزاء بيحت انا كل مكنون

الله من ليلٍ بتاليه ونيت

ونة كريمٍ داخل السجن مديون

والله من ضلعٍ بعاليه عديت

ودموع عيني فوق خدي يهلون

انا اشهد اني عقب فرقاه وليت

والحال عقبه صار من دون في دون

ياقبر انابانشدك بالحزن حسيت

في قلب والد صار بالهم مطعون

هذا شعوري يوم يمك تعنيت

والله يفرج هم قلبٍ به شجون

مرحوم ياللي طلته كنها( الليت)

اعداد ناسن فالحرم جو يصلوون

ومرحوم ياللي فالمرض حيل عانيت

اعداد مايبغض هل القدس شارون

وانا اطلب الله يوم للمقبره جيت

الصبروالسلوان والثالث العون

ماغيره احدن في حياتي ترجيت

ورضيت بامر اللي له الكاف والنون

رثاء بابنه رحمه الله