قلْ لمنهو خايف اني .. لا اصله

مايرد المنهزم غير الحزوم

تنبح كلاب وتسير القافلة

يكرمون قروم .. يسخون الرخوم

والله اني لو بغيته قاتله

وكل ظالم له من الأيام يوم

لاتحاكمني تراها قافلة

ولاتلوّمني ترى ملّيت يوم

ولاتجاملني .. تعبت مجاملة

راحوا اصحاب العوايد والسلوم

يسقط الساقط .. بأسفل سافلة

والردي ماهو ظهر وقت اللزوم

والنجوم الذابلات الآفلة

والله ان ماهي على خبرك .. نجوم

ماحسبنا للأمور الحاصلة

نحسب الدنيا ومافيها يدوم

وحجة الفاشل .. تراها فاشلة

لو يضبطّها .. ولكن عالعموم

البحر .. وأمواجه .. وسواحله

ماتفيدك .. دام ماتعرف تعوم

والقلوب الساهية والغافلة

مالها إلاّ رحمة الرب الرحوم

ومن ترك فرضه .. وصلى النافلة

مثل منهو قبل مايذن .. ينوم

حط خط وحط جنبه فاصلة

العزايم على قدر العزوم

والندي .. نبت الكرم بأنامله

مثل نبت العشب لاهلّت غيوم

والردي .. تعتازه أو تعتازله

كالسراب إلين ماهبنت سموم

والليالي بالعجايب حافلة

والسنين اتجيب لك كل العلوم

حالف لا اخاتله .. واخاتله

لين يسقط في يديني مايقوم

ومن يحب مقابلي باقابله

لو تحوم اطيوره .. اطيوري تحوم

بعت سلمه واشتريت مشاكله

وكان هو فارس .. فأنا للفرس روم

ومن بغى بعدي .. بغيت مواصله

له جوازاته وأنا عندي ختوم

قل لأبو قناته ومراسله

بيننا باقي حسابات ورسوم

والله ان تطبل عليه الطابلة

يوم يرجع حاني الراس مهزوم

ووالله ان اقلب عليه الطاولة

الصقر صقر ترى .. والبوم بوم

ومن طبخ للناس سمّ ياكله

وبالسموم يموت طبّاخ السموم

والرجل تاريخه ومراجله

راس ماله في الشدايد واللزوم

وهذي الدنيا تراها زايلة

وكل شيء غير ربك مايدوم

تقصر اقصور وتطول طايله

والله ان مالك زهاب الا الهدوم

والزمن لو تستحي عوامله

ماتطلع قوم وتنازل افـ قوم

ومن يشيل الحقد .. حقده شايله

لو يقول إنه على حقده كتوم

وماهي بلغزٍ .. وماهي معادلة

هم وهم تصير في الآخر هموم

وواحد يبغى الشرف يستاهله

ماهو بقانع بما دون النجوم

والزمن صحراء وشعري راحلة

وفرق مابين أصدقايه .. والخصوم