ما كتبنا القصايد للغزل والهيام

ولا كتبنا القصايد لأجل يرضي عظيم

سلّط الله على ناس تبيع الكلام

تشري الكذب وعلوم الردى يا ابراهيم

شاعر الفجر وده لو يشق العتام

بالمعاني ويحيي كل بالي رميم

ودّه الشعر ينبت ف. الصخر والعظام

ودّه ليا رماك يصوّبك ف.. الصميم

ودّه الناس تصحى من طويل المنام

تتعظ والجدايد يشبهن القديم

شاعر لو تلومه ما يرده ملام

فوق علمك وعلمه «يا معود» عظيم

علّم الريح تصهل واستثار الغمام

وعلّم الغصن الأرعن ينحني للنسيم

علّم الشمس تشرق من هديل الحمام

وعلّم الليل يضحك عقب ما هو كظيم

وعلم الحرب تخجل من رصيف السلام

والمشاعل تعيّي لا تشب الهشيم

أه يا ليت شعري ويش يفيد الكلام

الليالي غدت لي تقل خصم وخصيم