ماني مكلّف بالنوافذ ما معي غير السهر
والحزن يجمعني معك والليل يجمعني معه
هزّ الشجر ، قُلّه : كفايةْ ، لا متى حزن الشجر
من ينحني للعاصفةْ بكرةْ يخاف الزوبعةْ!
وانشد غصونه كم لها فوق المداين تحتضر
وانشد عروقه كم لها تحت الثرى متفرّعة
يا صاحبي " لابدّ من صنعا وإن طال السفر"
قلها ، وشبّ ضلوع صدرك وان طفا زد ولّعه
لا تنطفي لو تشرب عروق الظما واقدح شرر
لا بارك الله فالحياةْ الباردة والإمّعةْ
كم قلت لك يا صاحبي: قم ننزل بعمق البحر
ما فالسواحل غير صوت الكذب واهل الجعجعةْ
وكم قلت لك : لا تعطي الدنيا من عيونك مهر
وان ضاق بك صدر الزمن ما ضاق بك حلم السعةْ
ان كان تحصد ما زرعت0 النّاس يحصدها القدر
ما هو ضروري من زرع يحصد ويجني ما زرعه
واشرب هموم الوقت في كاس الحوادث والعبر
شف كم على ظهر البسيطة من تحدّر مدمعه
وشفني أنا اللي كنت ادوّر باصبعي راس السطر
اليوم صار السطر يتبعني على راس اصبعه
لو كلّ حزن يمرّني يلقى بصدري مستقرّ
ما خلّت بصدري مساحةْ هالطعون الموجعةْ !
لا تنحني يا صاحبي لو ما بقي غيرك بشر
من ينحني للعاصفة بكرةْ يخاف الزوبعةْ !