بغيت اجيب العيد في ظرف ساعه

في عيد ميلادك عسى الله يعيده

قلت اكتبك والشعر ما هو بضاعه

والنفس بلوى كل شي ٍ تريده

يمكن قناعه بس يا هي قناعه

جرحي عظيم وحب مثلك يزيده

اشتاقلك / اهواك ؟ هذي لكاعه

الا احبك والمشاعر بليده

قل ما تبي واترك علي استماعه

سولف وابكتب مانشيت للقصيده

سولف وسولف تو بيّن يراعه

ثغرك وثلجك بندقين وطريده

تبي الحقيقه ؟ انت اكبر إطماعه

يا مغرم المجنون والا ياسيده

ياعرض شعري ياعظيم ارتفاعه

الضلع الاعوج صعب والصعب كيده

احيا واموت بصمت همي وداعه

ولو شفتني بتقول وش ذا الوليده

والحزن دك القلب ثم هز قاعه

كم عرق في قلبي توقف وريده

اضحك مدام الوقت طاوي شراعه

ما قد عرفت الفقر والا الحديده

اضحك وطف الشمع بأخر مياعه

ثم ضم كف الولف من شوق بيده

والا انا معروف عندي مناعه

اكتب لغيري والقصايد شريده

ولا تسمي هالمحبه صياعه

كليتّك وش هي بليا عميده

لكن سؤال ولا ترد اندفاعه

ذيبك عوى وجروح الايام صيده

اسمك كذا والا مجرد اشاعه

وقصيدتك ابشر بأخر جديده

تابع ( نجوم ) واستمع للأذاعه

واليا بغيت تكون بأطلق جريده

لكن دخيلك خف ما اقوى دفاعه

جرحي ذبحني يوم اعديك حيده

بشويش عد الجرح والشبر باعه

واليا جلست اسمع كلامي بعيده

لو بس اشوفك بس لو ربع ساعه

في عين مثلي ياابيض الوجه عيده