يالله دخيلك عن دروب الظليمه

وتصون قلبي كان صوبه تمايل

وتجعل خطاوي رحلتي مستقيمة

تسوقها مع كاسبين النفايل

من بعد ذكره هز جاشي نديمه

قوافي قامت عليه تهايل

قوافي ما عدها للبهيمه

عسفتها عسف المهار الأصايل

واقلبي اللي ماكنٍ فيه ضيمه

عاش بزمان المضيعه والتحايل

راحت علوم المرجله والحشيمه

مع الرجال اهل الفعول الجزايل

فعل الجمايل ماله اليوم قيمه

ولاحد يهمه كيف رد الجمايل

يلحقك في هرج القفا والنميمه

لو انت عامل في جنابه عمايل

الحين لو يكفيك شره غنيمه

تسلم من لسان الردي والفشايل

يالله عسى رد العواقب سليمه

وتنشي علينا من صدوق المخايل

وتغسل ضماير بالمعاصي مقيمه

وتشيل حقد أهل القلوب العلايل