اشتقت لك يا فرحة العمر وين انت

يا للي عيوني منك ينبع ضياها

لولاك بالغايه بدنياي ما كنت

اشفق على ايامي يطول مداها

سرقتني مثل الكرى لي تمكنت

من مهجةٍ ما قبلك أحد غشاها

أشوف حسنٍ كل شئ تحاسنت

لو به ذهاب النفس أشوفه مناها

ما خبر يوم في منامي تطامنت

إلا أن بعثت الطيف لي في دجاها

أهين نفسي لك بمرضاك لاهنت

واتبع هواك بعسرها عن هواها

رجلي تيامن غصب كانك تيامنت

وان خذت باليسرى تياسر اخطاها

كلٍ بعينه زين ويلا تبينت

كلٍ زهد في خلقته ما بغاها

لوفات لك تسعين بالعمر ما شنت

في عين نفسٍ علقت بك رجاها

آمنت بك في عالم الحب آمنت

يا متلفٍ روح العنا يا دواها