ياشيخ صار اليوم كلٍ يبي يشيخ

وكلٍ يبي شيخه ويبغى يتشايخ

حتى الرخوم اليوم صارة مطانيخ

وتستغرب الرعيان صارة مشايخ

من صار عنده مال قالو له الشيخ

حتى لو السانه علي الناس لايخ

هذا زمانٍ فيه حتى الطبابيخ

صارو اهل شيخه وزود وفشايخ

الوقت فرسه مثل فرس المفاريخ

والناس تطبخ مابقا من طبايخ

لاشك يمناهم تجيب التناتيخ

يوم ان كفك ماتجيب النتايخ

عزك زمانك في سجل التواريخ

يوم ان غيرك بالسوالف يتايخ

نجومٍ تهاوا في مجرات مريخ

اسمك يخلي باقي الذكر بايخ

لك عزٍ ومجدٍ وذكرٍ وتاريخ

مايجهله الا ضعوف و دلايخ

خطوتك خطوة فاهقين التخاتيخ

ومن نافسك في دربك أيعود دايخ

ممشا الرجل منهم علي طخطخة طيخ

وممشاك يجبر من ضلوعه شلايخ

روزك ولا ثقل الرجال المنافيخ

بشوتٍ خلي وتكتسي بالنفايخ

خفاف العقول اهل القلوب المفاضيخ

روسٍ تدربا مع قلوبٍ فضايخ

ياشوق فدعاً ماكتست بالشماريخ

شوق الهنوف الي تشوق الطنايخ

وياماردٍ يارد عليه المناويخ

عدٍ عليه من المحاييم نايخ

شيخٍ كفو لاقالو الناس له شيخ

شيخٍ تحت شيخته ناسٍ تشايخ