انتظرني عند باب العشق لين اجيك ساعي

لاتباطاني وتعجلني وأنا توه رجوعي

طيعني يابلسم جروحي وياسبة ضياعي

قبل تكبر شرهة الخاطر وللخافق تلوعي

البحر طامي وصلف الريح يصفق في شراعي

وهالبحر لامتعبه صدري ولايرحم ضلوعي

المدى غربة ولحظات اللقاء مثل الوداعي

في زمن غير ومساعي غير ياعذب الطبوعي

أنت يااللي لك بعمق الروح مدهال ومتاعي

لو تخاشرفيه ماأظنك من الفاقة تجوعي

الطمع منبوذ والدنيا مساعيها مساعي

والقناعة كنز مايفنى وأنا رجلً قنوعي

أفرقك يالولو الغبة من اللول الصناعي

وأتمادى في متاهاتك على كيفي وطوعي

لاتدق طبول نار الحرب وأنت انسان واعي

خل عندك دبلوماسية قبل حربً تروعي

ماأنصحك تدخل طرف فيها وأنا دوني ذراعي

وأنت أظنك تعرف ذراعي وتعرف طول بوعي

باكر أرحل عشاشيقك على النقل الجماعي

باص سابتكو بعيد الرمس شيال الجموعي