القلب غصنٍ لأصدق الشوق ميال

ياكثر مايطري للأشواق حوله

ماللسهر ذمه ولا للخطاء حال

سر المساء هاجوس واسرج خيوله

لا عزت النومه وبال السهر طال

بالله مري يالدقايق عجوله

ماكل مايطري على البال ينقال

ولاكل شيءٍ لابغينا نقوله

مرات في صمتك اهانة واذلال

ومرات صمتك فيه عز ورجوله

يافاتنة ياناعسة يا اسم فعال

غير حياتي بانتماه واصوله

الليل لاغبتي عن العين واختال

يحق لة يفخر بلونة وطوله

مانتي امل لو كثروا انتي آمال

علقتها بايد الزمان وقبوله

يعني تجين بظرف لحظة على جال

فكري ولاترضين دور البطوله

ماللفكر منه على كل الاحوال

الفضل فضلك واغفري له فضوله

لعل شعراً مايورث للأجيال

يموت والتاريخ يدفن فصوله

الله لاجيتي بالأنفاس موال

شق الصدا قلب المكان وخموله

والله لاجيتي للأفكار مرسال

عز الكلام اللي يقال ورسوله

ياطفلةٍ عاشت على حس رجال

يقطف لها اللي كفها ماتطوله

فتحت قلبي وابتدت ترسم اشكال

تاخذ من الوان الوجود لذهوله

حلوه نعيش الحب بقلوب الاطفال

واحلى لو ان العمر كله طفوله