حزينه ليه يالجهرا ؟ علامك يابعد عمري ؟
علامه جوك الليلة كئيب ومظلم بعيني ؟
أنا جيتك وأنا مثلك حزين وضايق صدري
أبشكي لك عن همومي وأبيك إنتي تواسيني
إلا مني زعلت وضقت أنا والله من عذري
ترى ماجيت لك إلا وأنا أدري ماتخذليني
غليتك من غلا منهو سكن بك والغلا يسري
مثل ماجيت لك ساري غلاهم ساري فيني
ألا يالجهرا قولي وينه اللي شاغل فكري
هذاك اللي على شانه غديتي كل عناويني
هذاك الحب من قبله على بالي ولا يطري
ومن عقبه ملكني بالغرام ودمر سنيني
تركني وماعرف من عقبها شاللي غدا يجري
أحس إني فقدته أو عطيته شخص بإيديني
ترك لي يوم ميلاده رساله قبل لايسري
قبل هاليوم بأسبوعين يومنه يلاقيني
وضحك لي يافديت الضحكه اللي نورت عمري
وقبلني على راسي وقال إنه يب يجيني
وراح وتتبعه عيني إلا مقواك ياصبري
عسى ماهي بدايات النهاية بينه وبيني
ألا يايوم هالجمعة أبد ماأنت على خبري
كئيب وشوفة الجهرا أبد ماعاد تغريني
أحس بعبرة تملا عيوني ودها تجري
على خدي وأحس الكون ضايق مايكفيني
تصافق بي هواجيسي أبيع بحسرتي وأشري
غديت آدور بالجهرا ولا أدري أنا ويني
سرحت وراح أفكاري تشتتني وأنا مدري
صحيت ولا وعيت إلا وصوت به يعزيني
ترى بدري على علوم السعاده والفرح بدري
مدامه غايب ! عنه أبد ماشي يغنيني
أمانه ليه يالجهرا حزينه يابعد عمري ؟
وإذا حزنك على (الغالي) طلبتك لاتخليني