الليل دايم روعة في حضورك

عز الله انك تشعل الليل بالليل

اقبلت يسبق خطوتينك بخورك

من جيت كل عيونهم بك مذاهيل

ضاع العطر ماباقي الاعطورك

كنه تنثر من ثيابك شهاليل

يوم استدرت بضحكة من زهورك

استسلمت لشفاك كل التعاليل

شفت الصباح اللي بخدك يزورك

والليل شفته ممسي بالمجاديل

هذا نهار أو ذي تباشير نورك

اخجلت في طلعتك ضي القناديل

واقفيت وكفوفك تسابق شعورك

مشاعر فيها غرام ومراسيل

تعطي حنان من بقايا سرورك

وتغضي خجل بالناعسات المظاليل

ماسقت فيها للثريا غرورك

متواضع لو لك عليها منازيل

نام الهوى مابين بابك وسورك

في ظل جيد فيه حلو التفاصيل