تبادر عنيزة وأباقف وأبادرك

وارفع لك أصدق ما يناسب مقامك

كن المساء طيبٍ سرى من مباخرك

والبرق كنه يشتعل من سمامك

يا غالي رحنا نسابق مشاعرك

وجينا تحف أدروبنا باهتمامك

عبدالعزيز إن قلت أبقصد وأبشكرك

قالت عنيزة كلها لي سلامك

وأمست بساعات المواصل تسامرك

ذا ياسمينه مختلط مع خزامك

أنت الذي قلبك على الخير يأمرك

أوامرٍ للخير غاية مرامك

حطيت هم الخلق في وسط ناظرك

همٍّ يزول بنظرتك وإبتسامك

همٍّ بديجور الليالي يساهرك

راعيه غافي وانت ينكر منامك

وأقبلت بآمالٍ تسابق بشايرك

في نخوتك في حكمتك في شهامك

وأنت الذي ما ظن يرتاح خاطرك

لين الظمى يقطعه وابل غمامك

حتى غدت كل الخلايق تقدرك

تبدأ بحب وتنتهي باحترامك

من أول أسرارك على أقصى سرايرك

الصدق والمعروف صبغة كلامك

ومن ماضي أمجادك إلى مجد حاضرك

أشرقت خيرٍ مع بداية فطامك

كن الزمن قبلك لمجدك يدوّرك

هذا سنام المجد أو ذا سنامك

ومع قايد الأمة فهدنا يوازرك

الين أخذت بكل علمٍ وسامك

زعيمنا في كل رأي يباشرك

من التزامه تستمد التزامك

ومع زود نورك بالليالي ينورك

بدرٍ تكامل من تمامه تمامك

وختامها يا سيد الخير ابشكرك

الله يعلي بالميادين هامك

في صاحب السمو الملكي عبدالعزيز بن فهد ..