محبوب لاتسمع وتسمح تبايع

أحلامنا أحلا منى بس ياااااااني :

زبّنت في صدري ثلاثين جايع

ذلتهم احضان المدى والمباني

ناحو من اوقات البطا للوسايع

صاحو على سمع الثواني : "ثواني"

وانا أنا من باب سد الذرايع

ساكت أفتّش في مكاني مكاني

لاجل انهم شافو المعاني "منايع"

أخاف أقول ويشتعل بي لساني

مرات أحس أني " ملكّع" وصايع

ومرات أحس أني حكيم ب زماني

مسكين متمادي ب خطاياي ضايع

واضحك على " دقن " الأمل والأماني

ياصاحبي ياصاح بي صمت ذايع

كل السفن تنقل دموع المواني

خلك كذا لا تلتفت ل الوقايع

والدرب لو يستر منافيه "زاني"

أقسى من ضلوع الوفي ل الودايع

وأدفى من الحلم الندي ل المحاني

أصدق من إحساس الغلا ل التلايع

وأصعب من إدراك اليتيم التهاني

محبوب اسمع صاحبك لاتبايع

الا اذا أنك تنتظر عمر ثاني