الشعر ينعاف يا نواف

ما عاد له عندنا مزّه

أصبح مجرد عبَث وإسفاف

وأفكار وأوزان مهتزّه

مريض يحتاج للإسعاف

وان طاب يحتاج له هزّه

زهَد به الشاعر الشفّاف

وأختاره الشاعر الرزّه

اللي وقَف به على ميهاف

وصار يتحرّى متى الدزّه

شعر المجلات خلف خلاف

ما له حفاوة ولا فزّه

صوره وعنوان فوق غلاف

عزّوز يجلس تحَت عزّه

ضد التقاليد والأعراف

اللي بها الناس معتزّه

وفوضى وتهريج واستخفاف

وأذواق للشعر مبتزّه

وشعر ( المواقع ) قليل إنصاف

كل البشر فيه مرتزّه

مختَلطة ٍ عنده الأصناف

والباز عنده كما الوزّه

كلٍَ على موقعه وقّاف

يراقب الوضع ويقزّه

يقول أنا الموقع المضياف

إقلط على كبسة المزّه

لو جاه في اليوم عشر آلاف

يقول : يا برك هالحزّه

شاشه وفاره وتلغراف

ما من كلافه لأهل غزّه

ينعاف يا صاحبي ينعاف

من وضعه النفس منكزّه

ولا أقول أنا كامل الأوصاف

ماني بمعصوم ومنزّه

أصيب وأخطي ولي محراف

ولا همّني لابس البزّه

شاعر وناقد وأصون القاف

اللي عراويه منجزّه

وان جيت للحق يا نواف

الشعر ما عاد له مزّه