البارحة قفلت باب الصدر في وجه العتاب
حتى كسرت بخاطر العيد وتجاهلت عتبه
بابٍ يجيب الريح سده واستريح ولا تهاب
وان هزت اقفاله عواصيف العتب لا تقربه
المشكله لا هبت بك الريح وانت بدون باب
والصدر بيت اضلاعه الجدران والقلب عتبه
والنار تاكل فا الحطب والريح تنثر فا الزهاب
وانت الكسير اللي عيونه من زهابه لحطبه
من سوء حظه جا يطفيها بحفنه من تراب
طارت شراره واحرقت ثوبه ولحقت مزهبه
يا متن ابو زيد الهلالي سولف لشلفا ذياب
عن وايل وعن رمح جساس ومداه ومضربه
سولف واذا دمع السوال اغرق مناديل الجواب
كفكف دموع الاسئله واكحل عيون الاجوبه
من قال سيف العشق ما يقطع وهو جوف الجراب
انا اشهد انه ما عرف سيفه ولا قد جربه
وانا المجرب طعنته من سلته حتى النصاب
والجرح ينزف له سنه والدم واصل لركبه
واللي رماني با الخيانه وابتلاني با الغياب
جا يشري الراحه من المجروح ويبيع تعبه
جاني وهو يخفي ضيا نوره تحت ليل الحجاب
والليل لو يقدر يحجب البدر يمديه حجبه
هو ما انتبه ان فيه لوحة (لا يجوز الاقتراب)
والا تعمد يقترب منها لو انه منتبه
في مذهبه انه اذا اخطا ولا استغفر وتاب
يدخل بدون حساب جنات الهوى في مذهبه
لا والله الا فيه بعث ونشر وحساب وعذاب
وفيه الصراط المستقيم اللي لزوم يمر به
اطعم مية مسكين؟ واعتق له ثلا ث من الرقاب؟
والله ما ينفعه لو يعتق ثمانين رقبه
وينه نهار الصدر وادي خوف وهمومي ذياب؟
وانا اقطع الوادي واجي من مشرقه في مغربه
ادور الما والظما قتال والوادي سراب
وليا لقيت الما سراب ابل ريقي واشربه
كم قلت له وجه الخطا مرسوم في عين الصواب
وكم قلت له عين الصواب اعرف خطاك وصوبه
من كثر ما علقت في صدري من اعذاره كتاب
صارت شراييني رفوف وصار قلبي مكتبه
قبل اعرفه كنت اكذب الشعار واعذبهم خطاب
واكثرهم ايمان بمقولة اعذب الشعر اكذبه
وعقب اعترض لي في طريقي يا لعله با الذهاب
اصبحت انا صاحب مقولة اكذب الحب اعذبه