اناكان لي وجهة نظرلاتزال الآن

على حالها والحال مايندرى بعدين

على اللي مورد كلمةٍ مالهابرهان

يقول السنين تعلم الرجل لكن وين

لو ان السنين تعلم وماهوب غلطان

اجل ليه اصدق ضحكة الناس الى ذالحين

حكايات وامثال وقصايد وهرج لسان

ماغيرنتناقلها لاجل نكسرالروتين

ولاهي من السنّه ولاهي من القرآن

ولكنها مثل الدراهم لها وجهين

مثل من يقول ان افة العالم النسيان

ومثل من يقول ان الجمايل سواة الدين

وانا في رقبتي دين عبدالله وسلطان

مقادم كتايب جيشنا فالنهار الشين

سلاطين نجد اعيال من وحّد الشتان

مجدي الجهام معزي مطّوع العاصين

حدود البلاد من الحديثه ليا نجران

حكمها بشرع الله والسيف ابو حدين

عموماًً مثل ماقالوا الهرج له نيشان

من البيت هذا نقطه وفاصل وخطين

لياصار يمديني على الما وانا عطشان

ابشرب واعيّن خير واجلس واسولف لين

ارد الخبر والكلمه اللي وعدها حان

ابقولها واعلّم اللي ماهم دارين

ليا صرت حلو لسان ماني قليل احسان

موفقني الله ومتجمل من الصوبين

لأني وانا صادق علي الحرام ان كان

تكلمت فظهور الاوادم وهم مجفين

لكّن لاذكرت اني مسلّم على الرديان

تمنيت ربي لوخلقني بدون يدين

ابقول للي ينطح براسه الجدران

حسب مااتضحلي فيه وحده من الثنتين

او انه من الجدران متضايق وزعلان

او انه يبي يطلع لكن ما يعرف منين

ابتجاهله واسكت لو ان السكوت احيان

ضعف وانهزاميه وذله وكسرة عين

وانالاسكتّ اسكت لأني وسيع بطان

ومتأكد اني لاضعيّف ولامسكين

ابقوم بحمول الرفاقه واناشقران

يشيل ظهري حمل المجانين والصاحين

على شانهم والا انت ياممسح الريضان

تبي تتعب حنا على حالنا باقين