البحر لا تامنه في ثورته وإلا هدوّه

دام له قاع وسما والموج له روحه وجيّة

والرجل وإن مسّته الأوجاع عيب إنه يتأوّه

واجبٍ لازم عليه يقوم له في كل هيّة

يا سلام الله سلام الوايلي والجمع توّه

والمواقف شامخه والروس تطنخها الحميّة

والعرب في العز كلٍ من حطبه يشب ضوّه

يوم كلٍ يخطب العليا ونار العز حيّة

صلب جدي وايلة شاكر وكلٍ له علوّه

والبحور الطامية منّا والأمواج العتيّة

بنتنا بأفعالنا من حقها يوم إتفوّه

واتهيّى واتعبّى للمزاح الوايليّة

عزّنا اللي جابلٍ فينا الشجاعة والحموّة

والثبات إلنا لوماشان الدهر والمقدريّة

والصبر فينا على حكم الولي أطيب مروّة

شرع من لايتبع الغاوي ولايرضى بغيّه

ياعرب قولوا لأبن حيدر حسين يخيل نوّه

عاد برقه فالسما يلمع ومداته سخيّة

ماهو أب لعشرة إلا أبٍ لماوقّف لقوّة

حدّها من وادي أملح لين نجران العذيّة

غاب مشعل خير من يثني على فعله عدوّه

وخير من يفقده ابيه وخير من يفقده خيّه

غاب حرٍ جامع طيب الاخوة والأبوّه

والصبايا واللهٍ يبطن ولاولدن بزيّه

منطق الشيخ الحكيم وطيب مبداه وسموّه

والكرم والموقف المحمود والنفس الرضيّة

خلق وأخلاق وعلى ناسه وخلانه حنوّه

كل عينٍ تحب مقباله وتفرح في مجيّه

غاب مشعل والغياب ولوعته فالصدر جوّه

والعيون تشح بالدمعة ولو ماهي خليّه

ودها لاعرّض الشامت وهو يزهى بسوّه

ينكشح لاحق له يشمت ولايفرح بسيّه

والبحر وإن جف من بعده بحور تحل جوّه

والنجم لاغاب ضيه لاح نجم ورد ضيّه

يالله اني بإسمك الرحمن اسالك وأتجوّه

ترحم وتفسح وتبري العبد من ذنب وخطيّة

بين يدك وكل شي لك مراحه مع غدوّه

والعفو شرعك ولادايم سوى رب البريّة