الغنوج الي نوت للبعد والعشره نستها

مانويت فراقها لاكن شين الحظ ناوي

الله اكبر ياالحظوظ السود من يمي حدتها

لو بقول اني قويت فراقها ماني بقاوي

كن صورتها بدون فلاش فالقلب طبعتها

الفلاش خدودها والوجه دون فلاش ضاوي

المشاعر في يديها والاحاسيس اربكتها

كلها فتنه عسى ربي يكافينا البلاوي

لازعلت ترفع حواجبها وغزت برقبتها

بين هيبات الملوك وبين نظرات النداوي

لامشت ياعونت الله كل هالناس افتنتها

مو غريب ان جالها حكم من شيوخ الفتاوي

النعومه والترف والزين مع زايد ثقتها

لاضربنا كل هذولي في بعضهن وش يساوي

مايساوي غير اف الله ياحلو ثمرتها

بيضها سكر نبات وثغرها تمرن حساوي

والشعر لاطاحت القذله كذا ثم عدلتها

تربك الطاووس كيف تصير ربكات الهواوي

لاحكت كن السوالف ذايبه في حنجرتها

ولا اسكتت ماهو مسولف بعدها راعي الحكاوي

كرهتني بالحريم وحببتني مرحبتها

وعيفتني بالسواد ولعتني بالسماوي

وقمت اتابع كل شخصيت ممثل معجبتها

مرة رشدي اباضه ويوم فاروق الفشاوي

جننتي وكم قبلي من عقول جننتها

والعقول الي تجننها عجز فيها المداوي

اه ياليت الصدف وعيوننا ماصادفتها

كان ماذقت الفراق وصرت في حال الخلاوي

والله اني ماذخرت بكل حاجات اطلبتها

لو تبي هذي قبل هذي واصير الها عماوي

حاتمي والعروق الي اجي منها عرفتها

بس يكفيها خلاصت بيت فجحان الفرواوي

ماحسبنا للحسايب يومها البعض حسبتها

نشرب الطيبه مثل شربه فناجيل القهاوي

الله الله يالحظوظ السود من يمي حدتها

والله الله وش يزيل الهم يالقلب الشقاوي

قصت بيني وبين القلب وحروفي روتها

مايوصفها الكلام وشيبت بالفين راوي