أحدٍ عرف في البنك كم هو رصيده

وأحد بمخباته رصيده بطاقة

وأحد رصيده مايحصر تعديده

وأحد رصيده عشر معزا وناقة

وأحد ركب سيارة لة جديدة

وأحد مشى حافي على عظم ساقة

وأحد وقف عجزان فوق الحديدة

صارع زمانة لان ضيق خناقة

وأحد عزوم وقصر الوقت قيده

واشتال حملة لوفوقه وساقه

وأحد جزوم وبيد الدهر بيده

يبا ستر وجهة على غير طاقة

وأحد يقدم باليمين الزهيدة

وأحد عطا ربعة غزايز نياقة

ومد الزهيدة للفتى ماتفيدة

وقولت تعال وروح مر مذاقة

ومالاً مايستر صاحبة مايفيده

ان ماستر راعية ماسد فاقة

يلومني معطي المواجيب حيدة

اللي موثقاً حزامة وثاقة

ماغار مثل الضب ياكل رديدة

وتحصلة دايم هروجة دقاقة

واللي يشوفة قال وش هالوليدة

وهو لياجات اللوازم علاقة

لاماد خير ولا هروجة سديدة

تحداة عن جزل العلوم الحماقة

واللوم للي ماوقف مع عضيده

وللي يقصر في حقوق الرفاقة

والرزق عند الله ولا أحسد عبيده

ودقني ما قربها لموس الحلاقة

قلته وربي فاعلن مايريده

والبنك مابيني وبينة علاقة