عز الله اني داله البال مده

ايام ماني عارفآ كم عددها

احاول ان القلب يدله وصده

بعض الطواري لايجي في نصدها

واليوم اشوف هموم قلبي تحده

عادت له ايام الهوى الي فقدها

اليوم قلبي بيح الوقت سده

قلبي وقع في مشكله ماقصدها

وقع بحب الي كما البدر خده

في مزنتآ تشبه ثمانه بردها

سهم المنايا من نظرها تمده

شيهانتآ صادة على اول هددها

ليا ناحرت من شافها لا تعده

وليا اعرضت موته بطلعة نهدها

وشقرآ صفايف عن ثيابه تسده

شقرن على ناب الردايف رجدها

صدفه وصادتني سهوم الموده

صادفتها بالسوق تمشي وحدها

قلت السلام وبادرتني برده

ومديت يدي الها وصافحة يدها

قلت اسمحيلي بالسوال ومرده

قالت يطول الشرح يمكن بعدها

قلت المولع منك كلمة تسده

فيها شفا روحه ومنها نكدها

جرحه قديم ويمشي الوقت ضده

لا تجرحين جروحه الي ضمدها

وحال الخجل من دون علمآ ترده

وقفت وروحي ضاع منها جهدها

اخيلها والعنق يمي تلده

مثل العنود الي تلد لولدها

جدا المولع صفق يده بيده

مني بغت روحي تفارق جسدها

مدري من اي الناس ياناس عده

ولا علمتني وين موقع بلدها

واليوم صبري زاد من فوق حده

ومشاكل العشاق ما اكثر عقدها

من نار حبه كن جوفي تقده

والما المثلج بارده ما بردها

واطلب من الله كل يومن يرده

هو منتها شكواي وهوه سندها