الخوف من شيئ ما يخطر على البال

وإلا إن توقعت شيئ وصار .. عادي

والخوف ، ماهو تطير أسراب الآمال

ولا جناحٍ قصير ، وصمت شادي

لكن ليا طاح غصن .. وما بقى ظلال

يصير مثل المنافي .. كل وادي

وإن مات حلم ، وتبعثر قلب رجال

وش عاد .. لو في جفى الدنيا تمادي ؟!

يقطعك يا ظل ، ما يقصر .. ولا طال

وآخر جدار السما .. صبحٍ رمادي

يا كثر الأصحاب ، مداحٍ وعذال

وياقل ، لا كشّر الوقت ، الأيادي

والله .. لولا ( اللزيز ) اللي على الجال

ما حل ، (غبش الوزا ) ، ضرب الهنادي

وما زان للرأس ، لا غتره .. ولا عقال

ولا غدا ، آخر حسود ، أول حصادي

أدري اليا عدوا أهْلْ الخيل .. خيّال

وأدري تباطى الزمن ، عثرة جوادي

لكن .. وهالليل ظلما ، والشقا فال

من يقدر يقول .. ما هزّه عنادي ؟!

من ينكر الغيم ؟ .. والريضان تختال

على ثَغَرْها حديث الغيث بادي

هو يطعن الشمس .. لاجل الصبح ينزال

إلا قلوبٍ ملاها الله سوادي ؟!

والذبح : ماهو كلامٍ صعب ينقال

الذبح : قل الوفا ، وموت المبادي

والخوف من شيئ ما يخطر على البال

وإلا إن توقعت شيئ وصار .. عادي