يابدير انا لي حسّة ٍ كاميها

لاشك ماتثّر علي بعله

اصبر عليها واحتمي قافيها

عن جابة ٍ فيها علي شكلّه

وان كان جتني زلّة ٍ من ربعي

زلا ّتهم ماهيب عندي زلّه

اخفض لهم مني جناج الذلي

لكرامهم ماهوب خوف وذلّه

وان كان جتني من شجاع ٍ طيّب

اشتال زلا ّت الشجاع رضى ً له

وانا اعرف الطيب واعرف طبوعه

الطيب طبعه والردا ضد ّ ٍ له

وان كان ولّينه رفيق ٍ صافي

انا ولد عمّه وانا عز ّ ٍ له

وان كان عنده حيلة ٍ في حالي

اخذ حسابه وانتبه وافطن له

واقول يارجال حايد عنّي

مالك ومالي ياخبيث المله

واروح في حالي وهو في حاله

وهذي تراها للعفون جبلّه

يعطيك من راس اللسان حلاوه

حلوين الالسن والقلوب مغلّه

ولاني بتباع لشور المقفي

ان كان مقفي ليه يوم اقبل له

يقفي وانا واقفي والديار وسيعه

ومن فارق الوجه الغضيب احسن له

خلّه وانا عبدالمعين يولي

لا ناقص ٍ منّي ولا زود ٍ له

وان كان جتني من ضعيف ٍخايب

سترت خلا ته وانا ستر ٍ له

سترت خلا ته لحشمة غيره

ما أبى على ربعي يباين خلّه

ربعي كما الحيد الطويل النايف

ارقى براسه وانسدح في ظله

قلته وانا من لابة ٍ مشهوره

عز القبيله والعدو سم ّ ٍ له

اليا بنوا راي ٍ على مقلطهم

يبنون بني ٍ ماحَد ٍ يفلّه

والربعه اللي رايها يفرقها

لابد أعز ّتها تروح اذلّه

وان كان نقاض الحبال صميدع

ليا نقض هذا فذا يفتلّه

ولانيب راعي هرجة ٍ في مجلس

ولاأشيل خلق الله على خلق الله

الحق يالعراف عر ّاف الخلا

ماهوب في كثر الكلام وقلّه

ماهوب للهدات فالمجالس

للي يعالج مشكله ويحلّه

وانا على خصمي وسيع ٍ بالي

آخذ خصيمي بالسعه وامهلّه

احلم على خصمي بحسن اخلاقي

وإن كان لي حق مصيب أد ّلّه

امّا طلبت من الخصيم شهوده

ولا ّ قبلت الد ّين واخلص بالله

ولا قلطت بحجتي وشهودي

واخذت حقي من خصيمي كلّه

وأقول حقي وآخذه باثباتي

والحق سيف ٍ للرجال تسلّه

وان كان مالي حق أخاصم نفسي

واقول مالي حق والحمد الله

وإن كان جاني من يدوّر شوري

اعطيه من شور الهدى نصح ٍ له

واقول لاتاكل حلال المسلم

لكن خل الهوش دون الحّله

وان كان جاني من يدو ّر جاهي

ماأبخل بجاهي عنه وامري لله

وان كان جاني من يبا من مالي

اعطي واعيّي عنه ما أستكملّه

لابد من بيت ٍ يبا يبنى لي

يبنيه غيري واسكنه واحلّه

وان كان لي في هالكلام معارض

أسيلكم ياأهل المعارف بالله

انا معي حق ّ ٍ على سوالي

ولا علي من الرجال ختلّه

وختامها منّي صلاة محمد

نبيّنا الهادي ابن عبدالله