يَا زْمَانِي..
ضَيَّعْتِي الْبَارَحْ فِنْعَاسُو
جْرَحْتِي الْيُومْ فْإِحْسَاسُو
يَا زْمَانِي..
عَرِّيتِي لَخْيَالْ مَنْ لْبَاسُو
بِالْهَمّْ غَطَّيْتِي لُو رَاسُو
يَا زْمَانِي..
لا تْگُولْ مَا كَايْنْ بَاسْ
وَاشْ الْبَاسْ جَارِي
ولا شِي وَاحَدْ قُوَّاسْ؟
يَا زْمَانِي..
زْرَعْتِي فْلَعْظَامْ وَسْوَاسْ
وبْنِيتِي الْمَكْتُوبْ بْلا سَاسْ
يَا زْمَانِي..
زَدْتِي الْگَلْبْ نْكَاسْ
وحَطِّيتِي فَخَّكْ عَسَّاسْ
يَا زْمَانِي..
بَدَّلْتِي الذّْهَبْ بِالنّْحَاسْ
غَيَّرْتِي نَاسْ عْلَى نَاسْ
يَا زْمَانِي..
حْفَرْتِي لَگْدَمْ بِالْفَاسْ
شَعَّلْتِي النَّارْ بْلَهْوَاسْ
يَا زْمَانِي..
بَخَّرْتِي الأَمَلْ فْكَسْكَاسْ
طَلَّعْتِي كُلّْ مَنْ هُوَ خَمَّاسْ
دَلِّيتِي اوْلادْ النَّاسْ
بَكِّيتِي الشَّمْعَة عَلْ الْكَاسْ
يَا زْمَانِي..
لا تْگُولْ مَا كَايْنْ بَاسْ