قالولي إني أشبهك حتى بملامح طيبتك
الحمد لله يوم خلا لي خُطا تتبع خطاك
رغم إن ما هز الخفوق : إلا طواري غيبتك
ببقى على وعد السنين اللي رسمهالي غلاك
مدّيت كفّي للسما إشتقت اصافح شيبتك
المس مصابيح إكتست..لون البياض اللّي كساك
يا ليت للذكرى شفاه لا سولفت عن هيبتك
اقرى ملامحها مثل ما كان يقراني رضاك
كل الدروب ليا مشيت تحكيلي عن توجيبتك
وكيف إنها شالت كثييير وما لقت أحد بوفاك
وكل النوايا اللّي تخاف الله خذت من ريبتك
شي ٍ تجمّل به عساها بالعطا تاصل عطاك
حتى الرياض اللّي تقول إنه غدت حبيبتك
من يوم رحت:وهي تعزّم تاقف وتقبل عزاك
أثر المسا ماهو مسا دامه فقد ترحيبتك
مدري تغيّر أو أنا أتغيرت أو متنا معاك
لو هي على حزني يبه بأصبر بس.. مصيبتك :
باللّي عجز يلقى حزن بالكون يستاهل رثاك
يا صغر ه الدنيا بعيني لا طرت لي غيبتك
دام المشاعر لا غفت عن صوتك..تفز لصداك
الموت حق : ولو يخيّر إستحى ..من طيبتك
وإستغفر الله ما تعدّى باقي الخلق ..وخذاك ..!