عِدْ يا الروح من اول ما شفتك عدد الاسرار

من اوّل لقاء وأجمل عيونٍ تكتم الحيره

من أول مسافة بين جسمينٍ وبين النار

من أوّ ل "هلا" واوّل كلامٍ غاب تعبيره

وجوهٍ تحاورنا وإحنا للوعد نختار

ما كنّا نعرف إنّ البداية رغبة صغيره

تذكّر كيف قابلتك ورَحّبت بي في الدار

وضيّفتني بعينك بشيّ صعب تفسيره

جايز نبرتك جايز دفاك وجايز الافكار

جايز جوّك الهادي اللي زاد تعطيره

جايز نظرة عيونك جايز كل شيٍّ صار

نسّاني هلي وناسي واللي يسكن الديره

صار الوقت بس وقتي معاك بقدرة الاقدار

وصار الحب ما بيني وبينك صعب تقديره

سرعة برقك الخاطف نادتني مثل الامطار

نادتني ونادت من حسابي كل توفيره

عِدْ وياي كم كلمة "احبك" قلتها باصرار

عِدْ أيامي بيدك عِدْ اللوم والغيره

حاول تحسب أحداثٍ جميلة تحمل التذكار

دوّنها عسى جيلٍ جديد يكرر السيره

عِدْ اللي عليه تقدر لكن إختصر الاسرار

اللي بينك وبيني ما نحتاج تبشيره

قول أشياء وخلّ أشياء قول النار حبّت النار

من أوّ ل لقاء ويكفي خل نزيدهم حيره