بأمان الله ، مادام المنافي ما ترد أنسان

أبرحل والجرح ملح ٍ يجر أذيال أخشابي

ذكرت فمرةٍ جيتك أنا.. والثالث الشيطان

حرثت بصدرك الطاهر وقلت إبليس أغوابي

عدها قلت لك إنك كبرتي داخل الفستان

وإنك ما إنخلقتي إلا عطر مسكون بثيابي

وقلتي لكل أصحابك ، لثم في شفتي رمان

وأنه أعتاد في لحظة بلوغي يسرق أعنابي

أنا راحل عشان أني كرهت السجن .. والسجان

كرهت إلي يجي لحظة هدوء ، ويطرق أبوابي

أخاف ألد أعدائي يجي وآخذه بالاحضان

أخاف أن طال في وجهي المسا ينقال .. إرهابي

عشان إن الزمن يضحك ، قبل لايفرك الاسنان

تعلكت السوالف في فمي لين أنكسر نابي

ودام إن المطر ما يعشق الا أبعد الوديان

بشيل القحط للمنفى على الله تنبت أعشابي

وبرسم باكر فكراستي وأبعثر الالوان

وبفتح كل شبابيك النهار وألمح غيابي

لو إني قلت للمنفى .. أنا يا هالوطن بردان

أكيد أنه يدفيني .. بعد ما يحرق أعصابي

نعم لكن أنا راحل بلا وجهه ، ولا عنوان

ياأنا يا الدهر يقتلني أو إنه حيل.. يحيا بي

مدينه ما تهز إلا ولاد فلانه وعلان

حرام فيوم أعبدها ولو ساعه بمحرابي

أنا ما قد خلقني ربي الإعلى ضعيف لسان

ولاعمري رضيت الذل لجل الذل ، يرضى بي

مدينه ما بها إلا بعض أموات وأكفان

عليها الفاتحه ، الفاتحه في روح أحبابي